Executive日記——騰訊K11「眾創空間」 發掘本地多媒體創作人

  近期騰訊股價愈升愈有,最新消息係佢哋同K11合作,明年將喺香港成立一個「眾創空間」!雙方攜手打造線上、線下嘅文化創意生態圈,希望發掘同培育本地多媒體創作人。

  騰訊喺內地有好多「眾創空間」,佢哋決定喺明年喺香港打造第一個海外眾創空間,K11將成為獨家策略夥伴,而K11創始人鄭志剛亦會出任「騰訊眾創空間(香港)」營運方榮譽主席。K11老友同Kelly講,參與呢個香港眾創空間,係希望發掘同培育本地多媒體創作人,幫助年輕人發揮潛質同創意,推動大中華地區多媒體創作人創作。

  K11會將新世界發展旗下嘅觀塘KOHO大樓其中一層,變成多媒體創作人嘅辦公空間,提供專業設備,創作人可以喺嗰度進行攝影、剪輯、錄音等工作。

  而K11美術購物館就會提供表演場地、市場推廣等支援,安排具潛質的文創人,定期舉行迷你演唱會、舞蹈表演、視頻首映會等,等佢哋一展才華。

Kelly Chu

hd