Executive日記——互動遊戲贏酒店住宿或自助餐券 總商會「全程為您」 11.29免費搭電車小輪

  為咗慶祝香港回歸二十周年,同埋香港總商會創會一百五十六周年,總商會今年繼續舉辦「全程為您」活動,喺今個月二十九日請全港市民免費搭電車同天星小輪呀﹗總商會總裁袁莎妮(Shirley)話希望透過活動帶正能量畀大家,總商會仲會喺下星期推出互動遊戲,得獎者可以得到酒店住宿或自助餐券㗎!

  「全程為您」活動會喺今個月二十九日進行,大家可以喺當日免費乘坐來往堅尼地城同筲箕灣嘅全線電車,同埋來往尖沙咀至中環及灣仔嘅兩條天星小輪航線。Shirley同Kelly講,今年係總商會第七年舉辦呢個活動,佢哋堅持每年出錢出力係因為覺得個活動好有意義,「見到大家都好開心,活動當日真係搭多咗電車同天星小輪,覺得可以帶到小小正能量畀大家。」

  總商會又特別準備咗十架宣傳電車,昨日起喺港島行駛,等更多人知道有呢個活動,Shirley早前仲率領一班同事去到電車廠同電車留影O添!另外,總商會會喺下星期推出互動遊戲,大家到時只要分享自己搭電車同天星小輪嘅回憶,就有機會贏到豐富獎品,包括香港同澳門嘅酒店住宿、自助餐券等,記得留意佢哋facebook專頁喇!

Kelly Chu

hd