Executive日記——車迷朝聖有眼福 80部珍藏古董名車列陣!

  香港頂級車壇盛會「Gold Coast Motor Festival」昨日起一連三日喺黃金海岸舉行,展出超過八十部珍藏古董名車同超級跑車,主辦嘅信和集團今年仲加入多個新項目,涵蓋娛樂、電競、休閒、親子節目同美食,一眾車迷、收藏家同埋一家大小今個周末有好去處喇!

  第二屆Gold Coast Motor Festival昨日開幕,發展局局長黃偉綸、旅發局副總幹事葉貞德、信和集團副主席黃永光主持開幕儀式。會場中展出逾八十款珍藏古董名車,同埋最炙手可熱嘅超級跑車,呢啲車款喺歷史、工藝以至馬力方面都達極高水平,車迷真係大飽眼福!

  其中亮點之一係一九六○年Le Mans二十四小時耐力賽首次亮相嘅法拉利250GT/E,同埋被譽為日本首部超級跑車嘅豐田2000GT,仲有香港歷史最悠久嘅註冊汽車之一1926 Bentley 3L。而法國豪華汽車品牌Bugatti最新傑作Chiron更係全港首次公開亮相。

  會場內仲有豐富美饌,又有深受小朋友歡迎嘅電動賽車場、碰碰船、音樂表演、娛樂節目同汽車藝術展覽,啱晒一家大細享受家庭樂!會場內仲會展出兩部由香港大專學生研發嘅太陽能電動車,以推動年輕人創意發展。

Kelly Chu

hd