Executive日記——認真巴閉! 光棍節富豪花1700萬 掃入Aston Martin賽艇

雙十一成為全球消費嘉年華,Kelly身邊唔少朋友喺當日都購買心頭好,通常係小物件,慳運費嘛,但竟然有內地富豪花一千七百萬人民幣購入Aston Martin限量版嘅豪華賽艇,成為單一最大消費價單,究竟呢部賽艇點巴閉法?等小妹為大家解構。

呢架名廠Aston Martin限量賽艇AM37喺去年推出,由廠方驗豐富嘅設計師親自操刀,外形豪華時尚,前甲板上嘅環繞式擋風屏由一整塊玻璃雕刻而成,只要一按掣,滑動甲板就可以完全遮蓋駕駛艙,後甲板又可以伸出一個平台,方便上船同落水游泳。賽艇上仲有一張由頂級真皮造嘅大沙發,供八個人坐。船艙入面又配備咗可調光電燈、冷氣、雪櫃、微波爐同咖啡機,桌子又可以調整成一張舒適嘅牀,真係好歎!

          呢架全球限量訂製版水上超跑賽艇喺日前雙十一開始一個半小時後,就畀一個貴州買家以一千七百萬人民幣預定支付,成為雙十一最高單一消費單價。

  小妹發現,今年整個雙十一購物節總成交金額達到二千九百億元人民幣,相當於逾三千億港元,單係天貓就錄得一千六百八十二億人民幣交易額啦!喺天貓排頭十名嘅店舖包括蘇寧易購、小米、Nike同Uniqlo。

Kelly Chu


hd