Executive日記——小母牛星級跑手 競跑籌款助人

  參加跑步籌款,強身健體又幫到弱勢社群。Kelly身邊不少老友昨天齊齊參加咗小母牛「競跑助人2017」,為內地貧困家庭籌款。小妹見到奧運體操金牌得主李寧都有到場支持!

  昨日早上超過一千七百名跑手雲集科學園白石角海濱長廊,參加三公里、十公里同接力賽等賽事,奧運金牌得主李寧有份主持鳴槍儀式,而幾位香港體壇精英仲成為「星級跑手」,包括游泳運動員江忞懿、長跑運動員陳家豪同壁球運動員歐詠芝等。

  今年活動主題係「小母牛聯盟—跑出新希望」,希望透過慈善跑同一連串互動遊戲,為小母牛籌款,同埋加深大眾對小母牛扶貧工作嘅認識。香港小母牛主席梁錦松話,小母牛多年嚟透過牲口捐贈同協助農民提升飼養技術等方式,至今已扶助咗十三萬個內地農村家庭自力更生啦!

Kelly Chu


hd