Executive日記——星夜露天音樂會二萬人撐場 太古再贊助 延續港樂妙韻

        香港管弦樂團嘅音樂會一直深受樂迷讚賞,樂團前晚舉行一年一度的盛事「港樂‧星夜‧交響曲」,仲宣佈獲太古集團延續贊助三年,太古果然好支持音樂藝術啊!今年「港樂‧星夜‧交響曲」吸引逾二萬人喺中環海濱區欣賞美樂,仲首次喺尖沙咀海旁直播,與民同樂!

        太古集團由○六年起就開始成為港樂嘅主要贊助人,佢哋前晚宣佈會繼續贊助,由下年四月計起嘅未來三年共支持四千六百四十萬元,係港樂有史以來最大嘅企業贊助。而太古集團歷年來已經贊助港樂合共逾二億元!太古股份有限公司主席史樂山話,港樂係出類拔萃嘅管弦樂團,好榮幸同港樂嘅音樂家繼續合作。港樂董事局主席劉元生就話,好多謝太古集團多年嚟嘅慷慨支持,令港樂可以實踐使命,喺藝術上追求卓越,並推廣古典音樂。

  Kelly前晚出席「港樂‧星夜‧交響曲」時,現場好熱鬧,大人細路仔逾二萬人,坐滿中環海濱,佢哋一邊野餐一邊聽優美嘅古典美樂。小妹知道,港樂早前喺網上派發免費門票,唔夠半小時就派晒,一票難求,為咗讓多啲人分享美樂,港樂特別喺尖沙咀增設現場轉播,吸引幾千人隔岸觀賞,兩岸市民一齊喺璀璨嘅維港夜色下,陶醉喺音樂世界。

Kelly Chu


hd