Executive日記——愛心麵家新搞作 贊助保齡球賽

  盛記麵家扎根沙田區六十幾年,係街坊老店,店主B哥(張文強)熱心公益,每個月都派麵畀區內長者食一餐,宣揚敬老意識,又回饋社區!Kelly知道盛記又有新搞作,就係支持同贊助區內舉辦「沙田盃保齡球邀請賽」!

  為咗提高沙田區內居民對保齡球運動嘅認識同興趣,「沙田區中學校長會」、「保齡動力」保齡球會喺下月十號同十七號喺沙田富豪保齡球場舉行「沙田盃保齡球邀請賽」,畀「沙田友」參加,居民可以報名參加團體賽、個人精英賽,而學生哥就可以參加中學校際保齡球比賽。另外喺十七號又有保齡同樂日,沙田區居民可以免費試玩保齡球,體驗樂趣,臨場仲有專業教練作示範同指導。

  B哥同小妹講,自己喺沙田出世,好支持區內活動,而保齡球係一樣簡單易做嘅運動,希望鼓勵更多年輕人試吓玩吓啊!

Kelly Chu


hd