Executive日記——槓桿原理 慳力對抗強手 跟麥明詩學巴西柔術趕色狼

        十優港姐麥明詩喺社交平台自揭喺內地曾遭性侵,仲話為咗自衞,近幾個月開始學習巴西柔術。Kelly好奇請教吓老友,發現原來麥明詩就喺「九龍柔術」館上堂,館長之一仲同小妹分享咗幾招防狼術O添﹗各位姐妹都快啲睇片,學一招兩式傍身「防狼」啦!

小妹同「九龍柔術」旺角館館長Donnie Wan傾過,佢話巴西柔術係一種適合女仔保護自己嘅武術,因為動作巧妙咁運用槓桿原理,「以柔制剛」,身材矮小嘅女仔都可以輕易制服「大隻仔」。

  巴西柔術着重「地板戰」,即係「寢技」,致勝關鍵係佔據有利位置,配合攻擊技巧,例如關節技、絞技、擊打技等,以最慳力方法對抗強手。Donnie話,當有人想攻擊你,可以先將佢拖落地、纏住佢,令佢發唔到力,再以「鎖」技,用自己全身上下嘅力去打對方一小個部位,例如係用雙手去箍對方條頸,令佢腦部血液不足,整到佢頭暈。而巴西柔術中嘅「十字固」同「三角絞」係較常見嘅防狼術。

  Donnie透露,麥明詩就係喺「九龍柔術」學巴西柔術,課程一般喺開頭會教一啲基本動作,好似防衞、移動咁,之後會教「落鎖」,通常學幾個月至一年,就可以識點防狼。

  另一間有提供巴西柔術課程嘅綜合格鬥拳館Impakt MMA,就示範女仔遇到色狼胸襲、背後熊抱等情況,可以點樣運用巴西柔術自衞同制服色狼,大家快啲上頭條網睇吓,保護自己﹗

Kelly Chu

hd