Executive日記——下任港大校長研究成果 神奇隱形斗篷不日誕生

        傳將出任港大校長嘅美籍內地學者張翔,以研究隱形物料聞名。近日網上瘋傳一段短片,話係「未來港大校長張翔(圓圖)發明的隱形布」,小妹睇到塊布包住個人,成個人隱形,只見到背後環境,超級神奇,點擊飆升,有內地網民就即刻踢爆話係假喎!真假都好,張翔真係研究出「隱形斗篷」,但可能屬機密科技,資料不多。有理大學者話,喺理論上係可能製造到隱身衣,仲話產品指日可待。

        喺網上流傳嘅短片,一個男子喺身前打開一塊「隱身布」,塊布所遮擋嘅身體部份就即刻變透明,個人隱形咗咁﹗唔少網民質疑影片真確性,內地視頻製作公司亦話,片中效果只不過係透過After Effect等後期製作軟件造成,實際上個男子拎住嘅只係一塊藍色或綠色嘅塑料布,就好似科幻電影所應用嘅類似技術。

  Kelly周圍八卦,發現「隱形斗篷」可能好快實現。早喺○八年,張翔就研究出納米隱形物料,發現用一種「負折射率的材料」覆蓋喺物體表面,可以改變光波反射路線,令大家產生個物件不存在嘅錯覺,可以話係「視覺隱形」,佢當時研究出嘅負折射材料同超級透鏡,就獲美國《時代雜誌》雜誌列入○八年十大科學發現﹗

  唔少人期待張翔嘅嘅變「隱形斗篷」面世,小妹問過理大紡織及製衣學系助理教授葉曉雲博士,佢話呢個科研好有趣,相信可以應用喺紡織同布料上,仲話「隱形斗篷」嘅發明指日可待喎!

Kelly Chu

hd