Executive日記——大批一蚊筍貨等你掃 工展小姐1O佳麗齊亮相

        全港規模最大嘅戶外展覽暨年度盛事「工展會」將會喺下周六載譽歸來,場內會有超過四百家參展商、逾八百八十個攤位,今年繼續有多項震撼價優惠,包括「$1洗碗機」、「$1電飯煲」、「$1鮑參福袋」、「$8一吋」高清智能電視機等,好抵買啊!重點節目「工展小姐選舉」嘅佳麗昨天首次亮相,多次贏到冠軍嘅威馬企業今年派出靚靚員工出戰呢!

        由香港中華廠商聯合會舉辦嘅第五十二屆工展會,會由本月十六號至下月八號,一連二十四日喺維園舉行,超過八百八十個攤位會分佈喺十個主題展區,包括歷史悠久嘅香港名牌同創新時尚嘅新興品牌。

  大會會分三期推出唔同嘅「抗通脹購物優惠」,每期七日。「一元產品」中,會有「一蚊洗碗機」、「一蚊鮑參福袋」、「一蚊零食福袋」等,又有參展商推出限量「八元一吋」高清智能電視機震撼優惠,即五十吋的電視只售四百元,另外部份精選產品亦會低至一折發售,超抵!

  至於極具代表性嘅「工展小姐選舉」,十位候選「工展小姐」昨日首次亮相,小妹見到多次贏到工展小姐冠軍嘅「威馬企業」,今年派出市場部嘅林小姐出戰。威馬企業好威水,佢哋過往曾勇奪超過十次嘅工展小姐冠軍,佢哋同小妹講,話好支持呢個盛事,每年都參加,亦會幫助參選嘅同事做好準備,通常都會揀市場推廣部同事參賽,因為佢哋比較認識公司產品,有面向人群經驗,而且口才唔錯,好有策略啊!

Kelly Chu

hd