Executive日記——型格餐飲制服 冀為行業吸新血

  香港係美食天堂,餐飲服務員表現出色,但佢哋一直精益求精㗎,好似香港餐飲聯業協會特別搵人設計咗十二套嶄新餐飲服飾,適用於中式酒樓、泰式、雲南菜館等食肆,希望年輕人覺得着起制服感覺有型啲,吸引新血加入餐飲業,Kelly睇過啲衫,真係有型有款!

  唔少飲食業老闆都大呻請人非常困難,為咗提升行業形象,香港餐飲聯業協會就特別邀請「香港設計學院」,設計十二套嶄新餐飲服飾,包括適用於中式酒樓、西式、日式、泰式、雲南菜館等食肆,希望將餐飲業以新面貌展示畀大眾。

  佢哋昨日喺香港餐飲服飾巡禮展示,小妹見到雲南菜館嘅服飾好有民族特色,而酒吧員工嗰套就好有型!

  餐飲聯業協會昨日亦同時舉辦了第三屆香港餐飲聯業展,展示林林總總嘅美食,包括麵包及糕點、美酒、綠色及有機食品、廚具等。

Kelly Chu

hd