Executive日記——雜技文藝美食樣樣有 潮州節表演精采 食唔停口

        香港有唔少潮州人,由即日起有個啱曬潮州人同埋想認識潮州文化人士嘅好去處﹗香港潮屬社團總會舉辦「第二屆香港潮州節」,一連五日喺中環遮打花園為大家帶嚟多款潮州美食,包括手打牛丸、滷味等,又會展示潮州嘅新舊行業,包括線面、塑膠花作坊。昨日潮州節開幕,Kelly都有去玩,節目精采又食不停口!

        第二屆香港潮州節以「不忘初心‧潮拼香江」為主題,現場所見有幾十個攤檔,全部都各有特色,例如有巨型鍋烹煮手打魚蛋同牛丸,個鍋有三米乘三米咁大㗎!美食方面仲有潮州魚丸、蝦丸、墨魚丸,又有各式滷味,包括味道特別濃郁嘅澄海滷獅頭鵝、滷鵝翼、滷腳、滷鵝腸等。

  活動另一重點係潮州嘅新舊行業展示, 包括傳統嘅代寫書信、製衣等,新科技行業方面就有AR、VR技術、智能機械人等,仲有個「唱所欲言」攤檔,可以將大家講嘅嘢轉換成一首歌㗎!表演方面就有潮劇、潮歌、繡花舞等。昨日喺開幕禮上,就率先有鯉魚舞、轉碟雜技等文藝表演,小妹覺得好精采!

  香港潮屬社團總會監事會主席林建岳話,上屆潮州節吸引十萬人次入場,證明得到市民認同,希望透過潮州節做好文化傳承,令市民大飽口福同眼福,滿載而歸啊﹗喺本周日前,大家都可以免費入場,快啲去玩啦!

Kelly Chu

hd