Executive日記——針織聖誕欄杆唔使拆可放置到一月初

  網上盛傳銅鑼灣「Fashion Walk」購物街嘅針織手作聖誕裝飾欄杆,因畀人向政府部門投訴,可能喺本周日「被拆走」,Kelly了解後,知道最新消息係有關裝飾欄杆可以繼續設置至下年一月二號,真係好消息啊!

  恒隆地產旗下嘅 Fashion Walk最近以針織手作聖誕裝飾欄杆,增添節日氣氛,點知懷疑因為有人不斷向政府投訴而被要求拆除,引嚟大批網民不滿!恒隆地產發言人話,商場之前分別向路政署、運輸署同地政總署提交申請,分別收到上述三個部門嘅「不反對」或「沒有意見」回覆,但喺本月四號接獲有關部門通知,要求拆除相關裝飾品。

  不過恒隆昨日話,經與部門協商後,獲不反對繼續設置有關裝飾欄杆,仲可以放置到下月二號,即係同原定計劃一樣,可以過埋新年啊﹗小妹問過製作裝飾欄杆嘅本地藝術家La Belle Epoque,佢哋話聽到個消息都好開心,希望大家過個靚嘅聖誕節!

Kelly Chu

hd