Executive日記——慶日皇壽辰酒會歎靚和牛 張建宗食完即畀Like!

  日本駐港總領事館每年都為慶祝日皇生日舉辦酒會,素來被稱為城中最多美食嘅酒會,淨係和牛都就有好多種,每年都令Kelly流晒口水。

  Kelly昨晚去酒會,見到唔少城中名人,包括政務司司長張建宗等,日本駐港總領事松田邦紀一見到張司長就帶佢周圍試食,見司長食完岩手縣嘅和牛,即刻舉起手指公大讚!小妹唔執輸,去排隊試食與「松阪牛」及「神戶牛」齊名嘅「佐賀牛」,長長嘅人龍,但人人排得好開心,因為分到好大件,肉質似棉花糖般入口即溶,每啖充滿牛脂香味,好滿足啊!

  Kelly喺會場中遇到「一田」一姐黃思麗同羅太(羅范椒芬)。一姐話試食之餘,最緊要睇吓有咩好嘢,幫「一田」入貨。

  Kelly相信大眾好快都可以試到呢啲頂級滋味啦!

Kelly Chu

hd