Executive日記——傳統工藝透過社企發光 手寫小巴牌獲亞洲創新獎

        手寫小巴牌、手雕麻將牌、製作迷你花牌等,都係香港傳統手藝,可惜喺現今社會,少人使用,好多師傅轉咗行,呢啲行業逐漸式微。為咗令本土手藝得以薪火相傳,社會企業「傳耆」支持呢啲本土手藝作品,並向年輕人推廣,佢哋嘅努力,最近得到肯定,喺「亞洲社企創新獎2017」中成為香港地區嘅優勝隊伍之一,Kelly恭喜佢哋啊!

        傳耆喺兩年前成立,一直推廣跨代溝通,尤其着重傳統一輩同數碼新生代之間嘅交流,佢哋聯繫咗唔少傳統工藝嘅師傅,包括手製霓虹招牌、手雕木器、鐵皮鑿字、手寫小巴牌、手雕麻將、製作迷你花牌等,又發掘呢啲手藝作品背後嘅價值同意義,同埋具啟發性嘅傳耆故事,再同學界合作,藉住學界同媒體嘅分享,令大眾更加關注本土手藝。

  成立無幾耐,傳耆就獲頒發獎項,佢哋喺社交平台公佈,同另外兩間機構喺「亞洲社企創新獎2017」中,成為香港地區嘅優勝隊伍!亞洲社企創新獎係第一個亞洲區嘅社會創新企業比賽,傳耆稍後仲會喺「社會創業周末」中同其他國家嘅優勝隊伍角逐「最傑出表現大獎」,Kelly希望佢哋Add oil,為港爭光。

Kelly Chu

hd