Executive日記——調查指竹戰風氣轉淡 大專生反其道 打麻將交友

        Kelly唔好攻打四方城,自手機遊戲普及後,身邊好多朋友寧願打機都唔打麻將。昨天一項民調結果顯示少咗港人打牌,唔通麻將嘅垂死之歌要奏起?不過,Kelly剛大學畢業嘅同事話,有班大專生為咗捍衛呢種國粹,早前搞咗個「香港大專聯校麻將比賽」,等各間大專院校嘅麻將高手可以一決高下之餘,仲話打牌唔止用腦,仲可以識到「實體新朋友仔」,唔似手機交友都係虛嘅。

        昨天個民調報告話,只有百分之六嘅受訪者會每周打牌,較五年前同一調查下跌咗四個百分點,而負責調查嘅機構分析,因為電子遊戲普及,令麻將不及以往受歡迎。

  然而,有班後生仔上個月尾就舉辦咗個大專聯校麻雀比賽,吸引到二百多人報名,反應好好,最終有六十四人以先到先得落場對決,而大專生Daven係大專麻將比賽籌委之一,佢對Kelly話,舉辦比賽其中一個目標係推廣「香港牌」,又覺得牌品可以反映到個人修養。

  佢仲話,打牌比手機遊戲最唔同嘅地方,就係可以面對面同牌友傾計,了解真實嘅對方,結交到真實嘅新朋友咁話,而靠手機聯絡,就未必可以清楚對方為人喎。Kelly覺得有道理,網上真真假假好難分,大家得閒搵朋友打牌又好,食飯傾偈又好,總好過一個人對住個小屏幕呀。

Kelly Chu

hd