Executive日記——「麥文記」月尾拆招牌 打卡留念要快手!

        大霓虹燈招牌係香港街道嘅特色景觀,近年已買少見少,今個月底可能又少一個啦!去年獲選為「米芝蓮車胎人美食推介」嘅食肆「麥文記麵家」話,佢哋被屋宇署要求清拆大招牌啊!

        售賣地道雲吞麵嘅麥文記麵家喺佢哋嘅facebook專頁話,因應屋宇署嘅要求,佢哋喺佐敦道白加士街正門嘅大燈箱招牌,將會喺日內拆走,而大廈外牆有六十年歷史嘅霓虹燈招牌亦會喺本月底同大家告別。

        Kelly同麥文記老闆傾過,佢話佢哋個招牌有幾十年歷史,當年相關嘅規例同O依家唔同,可能唔符合現時嘅條例,所以就要拆走,仲透露同樣喺佐敦白加士街嘅其他店舖,O依家都進行緊相關工程啦!佢哋會先清拆舊嘅招牌,之後再製作番一個合乎規例嘅。不過,老闆都話好唔捨得舊招牌,知道平時有啲客人鍾意同佢哋個招牌影相,所以就喺網上公佈消息,等客人可以提前影相留念。

  小妹發現,同一條街道上仲有「澳洲牛奶公司」嘅招牌,若呢啲特色招牌一個個咁消失,真係好可惜,問過推廣招牌街景文化嘅組織「街招」,兩位創辦人、本地建築師Ken和Kevin都話,香港啲招牌特色在於佢哋好密集,形成獨有嘅街景文化,其他地方嘅招牌都無呢個效果,而且招牌係舖頭嘅標誌,亦係歷史文物。所以佢哋積極聯絡店舖,教佢哋保留招牌嘅方法,例如係將招牌變成室內裝飾咁,佢哋今次都有主動聯絡麥文記,而老闆亦有意將招牌保留啊!

Kelly Chu

hd