Executive日記——大帽山蓮姐:風大無霜但超凍 行山客圍「煲」取暖

市區寒冷,大帽山更加冰冷,昨天錄得攝氏負零點八度!Kelly好奇大帽山上有無結霜呢,即刻打電話畀喺山上開茶水亭嘅蓮姐問問,佢話風大無霜喎,但行山客人人凍到手都僵,搞到茶水亭個電飯煲最受歡迎,原來人人都圍煲取暖喎!

        蓮姐透過電話對Kelly講,昨天大帽山大霧兼大風,聽到呼呼聲同蓮姐把聲震震吓,小妹成身起雞皮。蓮姐話,呢兩日山上一直落雨,佢着兩條褲同穿三件衫都「凍到赤」!

  天氣寒冷,無乜行山客,前日只見十多人,昨天上午只得兩個,佢話上山者人人凍到隻手紅晒僵晒,拎銀包畀錢買熱飲又拎唔到,連去廁所都拉唔到鏈喎。

  天寒地凍,最正斗係熱飲,呢兩日熱朱古力同熱豆漿最受行山人士歡迎,但蓮姐估唔到連佢個電飯煲都人見人愛噃,原來人人圍住佢取暖啊!

  小妹提提大家,未來幾日天氣依然好凍,今日只得八至十三度,明日同後日都係約十至十五度咋!

Kelly Chu

hd