Executive日記——天際100全方位眺維港 鄭若驊註冊場地 有四個靚位播甜蜜片

        新任律政司司長鄭若驊新聞多多,包括佢自爆丈夫係建築界名人,原來兩人係喺尖沙咀天際100註冊結婚嘅,可見呢個可飽覽維港兩岸美景嘅西九高點,用作婚禮場地都好浪漫噃!Kelly了解過,天際100由地面搭(車立)上一百樓,一共有四個位可以播片,新人可以不斷播放拍拖片,一定令賓客甜到爆!

        位於西九龍ICC頂層嘅天際100,高三百九十三米,可享三百六十度香港美景,除咗畀遊人參觀,三年前仲開始提供婚禮場地服務,場地有一萬六千呎,可容納最多一千人。小妹問天際100嘅朋友,新人鍾意去片回顧拍拖過程,所以佢哋由入場位置到婚禮場地都有先進嘅設施播放影片。小妹數過,總共有四個去片位,包括地下二樓嘅立體投影屏幕、兩邊設有 LED 燈飾嘅「回憶長廊」,而由二樓坐上去一百樓嘅升降機,天花亦設電視屏幕,加上一百樓嘅婚禮場地亦有屏幕,任新人不停播甜到漏嘅片都得!

  另外,天際100提供多款婚禮套餐,無論係想簡簡單單搵個證婚場地,或搞個雞尾酒會,甚至舉辦隆重嘅婚禮宴會亦得。而婚宴顧問仲會根據新人嘅要求,設計主題婚禮裝飾,可以影低最動人嘅一刻㗎。

Kelly Chu

hd