Executive日記——30「人」重新聚首一堂 「小燈人」閃現海港城

  香港街道嘅工程好似永遠做不完咁,通街都係道路警示燈。有本地藝術家忽發奇想,覺得圓形嘅警示燈好似人臉,將佢哋化身成一個個「小燈人」!創作出三十個小燈人,放喺街上展示,可能太可愛,其中二十幾個被人拆走咗。為咗令小燈人重新聚首一堂,創作人重新繪畫一次,仲喺海港城開設作品展,聽到都覺得好得意!

  藝術家章柱基 (Kila) 去年六月初開展為期一個月嘅小燈人計劃,同女朋友每日將一個小燈人放喺唔同地方,再喺社交平台發放消息,吸引大眾四出找尋佢哋嘅蹤影。每個小燈人都有名字,代表香港唔同人物,好似有小地藏、小塵、小事頭婆等。

  Kila話,由身邊人同事之中找尋創作靈感,透過放置小燈人喺唔同地區,同地方產生互動喎。

  不過,唔知係有人將小燈人私藏,定係被清潔工清走咗,三十個小燈人最後只剩低七個,Kila於是重新繪畫呢三十個小燈人,由即日起至本月二十一日喺海港城.美術館舉辦首次個人作品展《Twinkle Twinkle Little Guys 一閃一閃小工程》,同時展示三十張小燈人攝影作品,又推出新書,記錄咗Kila喺呢三十日內嘅歷程,同埋小燈人與人們相遇嘅故事咁話!

Kelly Chu

hd