Executive日記——鄭若驊列席立會 司局長變護花使者 波叔葉問上身夠晒man

        昨日特首林鄭去立法會出席答問會,捲入僭建風波嘅律政司司長鄭若驊首次列席,成為焦點人物,喺離開時被近百名記者追訪,令佢寸步難行,情況混亂,幾位司局級猛男立刻變身G4(保護要人組),擺出鑽石形保護網,幫佢開路,其中財爺陳茂波最勁抽,好似葉問上身咁款,擺出國術架式,仲把若驊擁入臂彎,體貼護花!

        昨日答問大會一完,各個司長、局長即刻醒水,喺會議廳內開始貼近鄭若驊,以防有議員埋身抗議。小妹見到政務司司長張建宗一馬當先上前,帶領守護隊伍,除咗幾名立會保安,鄭若驊右手邊有財爺波叔看護,左手邊有出身警隊嘅保安局局長李家超,外圍仲有財經事務及庫務局局長劉怡翔、創科局局長楊偉雄等,成班司局級猛男保護,仲擺出G4嘅鑽石形保護網,密不透風,超有型啊!

  鄭若驊本身打算循立法會會議廳外嘅扶手梯離開,一走到外面,被近百名記者包圍,追問佢僭建一事,搞到佢寸步難行。呢個時候波叔即刻好似葉問上身咁,張開雙手,似要出招,威勢十足,呢個臨時保鏢喺人多擠擁嘅時候,仲以雙手簇擁鄭若驊,真係貼心!呢個司局男保護人鏈,陣容強勁,當然無人可以埋到鄭若驊身啦!

Kelly Chu

hd