Executive日記——捕捉小朋友精靈可愛一面 昂坪360水晶車廂 瞓喺地影相好盞鬼

  大嶼山風景優美,唔少人都鍾意去嗰度行山、露營,Kelly覺得要欣賞大嶼山,除咗可以喺地面之外,高空觀賞亦都係唔錯嘅選擇!最近就有一對好可愛嘅混血兒兄妹,同佢哋屋企人乘搭昂坪360嘅水晶車廂,觀賞大嶼山風光,媽媽仲好有心思咁叫兩個小朋友瞓喺車廂地面,幫佢哋影靚相,小妹見到啲相好趣致啊!

  坐昂坪360嘅水晶車廂可以將大嶼山風光一覽無遺,一個熱愛幫囝囡影靚相嘅媽媽Angela亦睇中水晶車廂呢個優點,上月底帶同一對囝囡同埋丈夫,再加埋一位訪港朋友,一齊去咗坐纜車。當佢哋身處高空時,Angela就叫囝囡輪流瞓喺車廂地面,為佢哋大影寫真。翠綠嘅山景成為相片嘅背景,加上自然光,啲相全部都又自然又有質素,仲捕捉到小朋友精靈、趣怪又可愛嘅一面!唔使去影樓,亦唔使高超技術,都可以影出靚相!

  小妹問過Angela,原來佢係中國人,而佢丈夫係巴西同日本嘅混血兒,難怪一對小朋友生得咁可愛啦!佢哋已經喺香港住咗接近五年,話好鍾意喺香港周圍探索呢!佢影相咁叻,小妹都要同佢取下經先得!

Kelly Chu

hd