Executive日記——聶德權劉鳴煒郭位齊落場 蛋黃哥轉死性 奮戰渣馬

        一年一度的體育盛事渣打馬拉松昨天舉行,吸引城中名人參賽,包括政制及內地事務局局長聶德權、青年事務委員會主席劉鳴煒、城中校長郭位等,Kelly仲見到好多人「盛裝」打扮參賽,例如孖寶兄弟、熊本熊、鯊魚、蛋黃哥等,好得意好有趣!

        第二次參加半馬嘅聶德權話,覺得天氣算唔錯,唔太熱,只係有啲地方風大,佢用咗兩小時九分鐘完成比賽,過程好順利,仲為香港防癌會籌到善款,所以好高興。佢賽後仲去咗港大攤位留影,接受中醫學生拔罐,紓緩肌肉疲勞,又同佢哋傾吓中醫藥發展O添!

  「男神」劉鳴煒一如往年,帶領同事參加渣馬,佢同四個同事一齊參加半馬,其餘同事就參加十公里。佢好鼓勵同事多做運動,又覺得馬拉松係一個畀自己嘅挑戰,所以鼓勵同事為自己設一個目標,喺比賽前多作訓練,而同事們都好積極,喺公餘時間齊齊集訓,好齊心!

  城市大學校長郭位已經連續十年參加十公里跑,他昨日更率領過千位教職員、學生及校友參加,他完成賽事後,有啲感觸咁話,跑馬拉松就好似辦大學咁,兩者都係「一步一腳印」咁行過嚟。

  唔少人參賽不為成績只求開心,有本地動漫「癲噹」、日本動漫龍珠、熊本熊、薯條、恐龍、印第安人等裝扮現身。有人扮成鯊魚,向大眾帶出關注環保議題; 綠色和平就派出四人扮成熊貓、綠海龜、黑臉琵鷺、中華白海豚,宣揚保護瀕危動物。小妹仲見到,出名懶惰嘅卡通人物蛋黃哥都有參賽,睇嚟小妹都唔可以咁懶,下年要一齊參加玩埋一份!

Kelly Chu


hd