Executive日記——市民冒寒上山覓霜 失望而回 大帽山結冰? 網相真假難分

        香港呢幾日凍到Kelly騰騰震,大帽山昨日最低氣溫跌到零下一點八度,打破冰點,好多市民冒寒上山想睇結霜,但係「失望而回」,但Kelly收到朋友傳來好多張相,見到啲花草樹木結晒冰,唔知係咪香港發生呢?天文台朋友就話,昨日無收到任何結霜報告喎。

        大帽山昨晚凌晨最低得零下一點八度,有好多市民無懼寒風,特登走上山想睇結霜罕見景象,其中包括嚟自天津嘅蔡先生。佢遠道而嚟,話霜就見唔到,不過睇到皎潔嘅大明月,算不枉此行喎。大帽山茶水亭蓮姐都話,昨日朝早超級凍,有市民專登上山話想感受吓「全港最凍」,順便睇霜,不過據佢問過,人人都話見唔到。

  小妹手機收到朋友傳來好多相,見到啲植物結晒冰咁,都唔係咪喺香港影到,真假難分。網上甚至有人話馬鞍山有飄霜,仲拍埋片,但係好多網民都話條片嘅背景完全無郁,好懷疑係偽造喎。小妹問吓天文台朋友,佢就話昨日無收到結霜報告咁話。

Kelly Chu

hd