Executive日記——支持社企 支持小農 口味創新 伯爵奶茶年糕登場

        仲有半個月就到農曆狗年,Kelly準備食好嘢啦!小妹鍾意年糕,唔係傳統果幾款,而專門挑選有趣創意嘅新品,俾小妹發現社企「共廚家作」推出伯爵奶茶味年糕,好得意!而樂施會嘅「生態小米瓊鍋糖」更曾是朝廷貢品!

        小妹每年都覺得盒年糕份量多咗啲,眼闊肚窄,最後食唔晒,丟掉又浪費!o依家唔使怕啦,因為社企共廚家作推出《茶。花禮饌》賀年年糕禮盒,每盒有四件,每件都只係一百克,份量剛剛好。而且佢以茶入饌,十分創新,四種味分別係伯爵奶茶糕、桂花雙薯糕、柚子蜂蜜糕同玫瑰椰汁糕。佢仲係玫瑰花造型,好靚!

  樂施會嘅樂施商店就有「生態小米瓊鍋糖」,呢種糖係陝西傳統食品,有超過八百年歷史,曾經是朝廷貢品!陝西省「小農」種植生態小米後,會交由有三十年造糖經驗嘅師傅,人手製造出呢種清甜不膩、香脆鬆化嘅傳統小食,小農係擁有好細塊田地,只能養活自己嘅農民,所以大家喺享用美食同時,仲可以支持呢班農夫㗎!

「港嘢」福袋支持本土

  另外,素食餐廳「無肉食」就有全素年糕,包括蘿蔔糕、山渣糕等;天水圍一班婦女組成嘅「天姿作圍」亦推出有機薑汁棗皇年糕,係用本地有機薑整㗎!至於支持本地農業嘅團體「港嘢」就大推各式福袋,入面有手工生態本地薑糖、手工南棗桂圓核桃糕等,好多選擇!

Kelly Chu

hd