Executive日記——臨近情人節 關注年輕人性教育 大玩交友App 「男神」唔怕扭耳仔

        時下年輕人鍾意玩交友App,識朋友,甚至以此結識伴侶。Kelly發現連人稱「男神」嘅青年事務委員會主席劉鳴煒近排都有玩交友App,仲好仔細咁分析唔同程式嘅特點,唔通男神都想識女仔﹖小妹問過已有女朋友嘅男神,佢話其實係因為臨近情人節,所以想提醒大家關注年輕人性教育嘅問題,大家唔好誤會咗喎!

        小妹喺男神facebook專頁見到,男神同事偷拍佢玩交友App嘅情況,仲話佢「坐咗喺到半日,對住部手機係咁掃」,小妹見到男神係咁掃去右邊,啫係程式內嘅用家,個個佢都鍾意,好多心喎!佢仲玩玩吓喺到大笑,唔知有乜令佢咁開心呢。

  男神同小妹解畫,其實佢都係試玩吓,了解唔同交友App嘅運作同要求,佢仲做咗一個詳細分析,話有一個交友App係全球最多人使用,高流量,設計又簡潔;有一個就要求用家提供好詳細嘅資料,希望配對得更有質素;另一款就只可由女性展開對話,提供安全交友體驗,減低男方騷擾。

  親身體驗交友App,又咁認真比較,男神話係想反映青年人現時有用交友App喺網上認識朋友嘅情況,同埋因應臨近情人節,提醒大家關注年輕人性教育嘅問題。所以佢喺帖子中附上一份「香港性教育研究報告」,男神果然好有年輕人嘅心!

Kelly Chu

hd