Executive日記——全盒新選擇 巧婦惜食妙計 蘿蔔變「黃金白玉漬」

        臨近新年辦年貨,全盒入面除咗可以放糖果同朱古力,仲有乜選擇﹖Kelly昨日途經長沙灣,見到香港婦女中心協會舉辦咗個以「醃漬」為主題嘅食街,嗰度有好多由婦女親手醃漬嘅漬物,包括泡菜、德國酸菜、米糠漬、木瓜漬、蜜糖蒜頭醋漬等等,好好味喎!

        協會聯同小而美俱樂部、漬女、習慣X自然、家家廚房、天姿作圍、二澳農作社等團體舉辦「食街」活動,佢哋除咗賣冰糖佛手膏、紅菜頭漬、泡菜、木瓜漬等嘅漬物,仲同大家分享製作方式。聽佢哋講,就算醃同樣嘅食材,每個人嘅漬物味道都會唔同,因為內藏住獨特嘅愛同心意,好有趣﹗

  協會話,佢哋舉辦「好惜食」計劃,早前搵嚟一班婦女,將喺深水埗街市回收得到嘅蘿蔔製作成「黃金白玉漬」,希望透過呢個計劃,推動婦女發展自我,同時亦都可以善用一啲過剩食物,將佢變成漬物,物盡其用。小妹知道醃漬可以話係傳統文化,而且可以令人品嚐到食物嘅真及美。咁有意思,小妹都買咗啲漬物支持吓,放入全盒請親朋戚友食,將來有機會,都要學吓醃漬先得!

Kelly Chu


hd