Executive日記——維園年宵產品有創意 「通勝咕o臣」打開有玄機

        農曆狗年快到,Kelly早兩日去咗維園行年宵,見到好多得意產品!除咗狗仔產品,仲有啲好有心思嘅自家設計產品,例如係「鐵皮揮春」同「通勝咕o臣」,大家仲可以打開通勝咕o臣,喺「宜」和「忌」一欄放置相片㗎!

        紙製揮春見得多,鐵皮揮春就第一次見,每張好重手,夠晒份量,上面圖案同字句好可愛,例如拎住公事包嘅打工仔配上一句「準時收工 NO OT」,認真盞鬼!仲有寫上「家有肥犬」、「狗年彈起」等祝賀說話,好有諗頭!鐵皮揮春由「鐵皮工作室」嘅Meg設計,佢話靈感來自外國嘅懷舊車牌,令佢想製作一啲屬於香港嘅懷舊產品,紀錄本地特色人事物。

  「通通通勝」攤檔由十一個後生仔經營,出售六款通勝產品,包括環保袋、襪、文件夾等,最特別嘅就一款「通勝咕o臣」,只要打開內頁,可以喺「宜」和「忌」一欄放置相片,十分盞鬼!成員陳家希話,佢哋覺得通勝入面有好多得意同重要嘅資訊,但現時已經無乜人用,所以就整咗一啲惡搞設計,希望增加年輕人對通勝嘅認識!小妹仲見到一檔賣狗屁股造型頸枕嘅攤檔,可愛又舒服!

Kelly Chu

hd