Executive日記——陶傑話唔好着大紅大紫 遊日搭新幹線大忌高聲說話乞人憎

        日本係香港人最鍾意嘅旅遊地點之一,但千祈唔好樂極忘形,否則日本人嬲咗你都唔知。小妹見到日本民營鐵道協會發表咗「搭乘新幹線最令人討厭行為排行榜」,「高聲說話」名列第一。小妹問過才子陶傑,佢話港人去日本時,仲要留意衣著切忌大紅大紫喎!

        日本民營鐵道協會公佈呢項民調結果,發現新幹線乘客最憎其他人「高聲說話」,第二係唔鍾意人哋「坐姿不良」同「亂放東西」,第四係「邊走路邊使用電話」,第五係「乘客還未下車就擠上車」,港人都幾大機會不自覺做咗上述行為。小妹請教吓陶傑,以佢對日本文化嘅了解,遊日須注意乜嘢事,才子話首先要「降低聲量」,形容廣東人習慣大聲講話,日本人會好反感。

  才子話,預訂咗溫泉酒店,唔好突然取消,就算要取消,要依照人哋規定去做,否則日本人唔Like;而用餐完,唔好搞到杯盤狼藉;住酒店房間唔好搞到亂七八糟,「唔好以為畀咗錢就大晒﹗」仲有唔好着到大紅大紫咁,要配合人哋嘅環境咁話!大家切記啦。

Kelly Chu

hd