Executive日記——長壽DJ停播疑雲 Uncle Ray動人舊歌

第三台繼續播送

  港台著名唱片騎師Uncle Ray(郭利民),被譽為「樂壇教父」,Kelly一向好鍾意聽佢嘅節目《 All The Way With Ray》,不過近幾個月好多朋友話聽唔到,以為取消咗,問過Uncle Ray先知,原來節目一直有播,只係港台去年九月起調動頻道內容,無咗第四台嘅聯播,但大家依然可以喺第三台聽到㗎!

  喺二○○○年,Uncle Ray憑住《 All The Way With Ray》呢個長達三十年嘅港台節目,獲健力士世界紀錄頒授「全球持續主持電台節目最長久唱片騎師」,非常厲害!呢個節目直至依家仲繼續逢周一至五晚上十時至凌晨一時喺港台三台播放,十分受樂迷歡迎。

  一直以來,呢個晚間播舊歌節目,係由港台三台(AM567、AM1584)製作,並由第四台(FM 97.6 - 98.9)聯播最後一小時,已經有超過三十年歷史,所以好多聽開FM嘅聽眾都係聽第四台。不過,港台喺去年九月四號起取消數碼廣播,原本由數碼電台廣播嘅節目要轉移到四台播,四台就改喺晚上十一時開始轉播英國BBC嘅節目,無再聯播Uncle Ray個節目啦,呢個轉變令唔少聽眾都以為個節目停播。小妹問過Uncle Ray,佢都話收到唔少電話同電郵查詢,問點解個節目無咗。

  實情係個節目喺三台都繼續播放,但三台主要為AM制式,接收同音質都與FM不同。Uncle Ray話,依家部份收音機都無AM,就算有都接收得無FM咁好,所以佢呼籲各位樂迷,改為上網聽節目直播,或者之後重溫都得㗎!

Kelly Chu

hd