Executive日記——泰司機愛廣東歌 獻唱《灰色軌跡》

  廣東歌、港產片等香港流行文化其實紅遍國際,唔少內地人、外國人都深受影響。最近有網民喺社交平台分享短片,話佢喺泰國旅行坐的士時,就遇到一個話自己好鍾意睇港產片《天若有情》嘅司機,司機仲即席獻唱電影插曲、Beyond經典歌曲《灰色軌跡》O添!

  網民「Tsui Anson」喺facebook群組「巴打絲打Facebook Club」分享兩段短片,佢話自己喺泰國曼谷旅行時坐的士,遇着一個司機聲稱好鍾意睇一九九○年由劉德華、吳倩蓮主演嘅《天若有情》,佢仲開埋YouTube播放電影插曲《灰色軌跡》,即席跟住唱,令佢哋好高興!

  小妹聽到呢位泰國司機雖然廣東話口音唔純正,但真係記得晒啲歌詞,仲唱得十分投入,一句「我已背上一身苦困後悔與唏噓,你眼裏卻此刻充滿淚」唱得好有感情,當佢唱完副歌後,Anson同佢朋友都為司機歡呼,成架車氣氛好好!

Kelly Chu


hd