Executive日記——G4開路 埋單逾三萬 摩洛哥國王出巡 逛上環小店掃《小流氓》

        中國功夫揚威海外多年,唔少外國人一見到華人就想起功夫,嚟到香港都選購同功夫有關嘅紀念品。Kelly最近聽喺上環經營舊物古董店嘅老友講起,近日有個猛人到來幫襯,一口氣買咗幾本黃玉郎嘅《小流氓》同埋其他懷舊物品,呢個猛人坐豪華房車到場,仲有要員保護組(G4)開路,咁架勢,原來佢係摩洛哥國王!

        專門出售本地舊物嘅潮店「Select-18」老闆Mido同小妹講,農曆新年後有一日有奇怪嘅事發生,喺下午有幾個彪形大漢出現,喺佢間舖頭行嚟行去,好似巡場咁。到咗傍晚,彪形大漢再來,仲問佢哋幾點收工,店員有啲驚,怕有事發生,即刻打畀老闆求助。

鍾情可口可樂產品

  喺當日下午六點過後,有三架半島酒店嘅豪華房車出現,仲有警方保護要人組G4開路,十分架勢。房車上幾個貴賓入咗店內,其中一個身形肥肥哋嘅男人買咗幾本黃玉郎嘅《小流氓》、十幾副懷舊眼鏡,仲有一系列嘅可口可樂產品,包括廣告牌、膠杯等,好似對可口可樂情有獨鍾咁。呢位客人總共買咗三萬幾蚊,十分豪氣,Mido後來周圍問吓先知道,原來佢係摩洛哥國王穆罕默德六世!

  連國王都特地幫襯,香港呢啲特色小店吸客能力真係好高,小妹覺得旅遊業同有關部門應該多多推介民間特色小店,吸引多啲遊客來港,咁對旅遊業、零售業都有莫大幫助㗎﹗

Kelly Chu

hd