Executive日記——陪妻女見貝兒公主 John Legend一家 溫馨遊迪士尼

        電影《星聲夢裡人》喺香港上映嘅時候大獲好評,連帶電影入面嘅歌曲都人聽人愛,有份參演同演唱電影歌曲《Start A Fire》嘅美國騷靈創作歌手John Legend近日嚟香港開演唱會,出名顧家嘅佢,被發現趁空檔時間陪同大肚嘅太太與快兩歲嘅囡囡一齊到香港迪士尼樂園遊玩,囡囡仲變身《美女與野獸》嘅貝兒公主,十分可愛!

        John Legend前晚喺香港亞洲博覽館舉行演唱會,係佢闊別香港十一年之後再次嚟開騷,全場觀眾睇得好投入,好興奮!Kelly聽聞,John Legend唔止重視工作,亦好緊張家人,所以今次來港仲帶埋模特兒太太Chrissy Teigen同囡囡Luna,佢仲喺前日開Show之前,同妻女一齊同遊香港迪士尼樂園。雖然美國都有迪士尼,但Luna就未去過,所以今次係佢首次踏足迪士尼!

  香港迪士尼員工知道Luna好鍾意米奇同美妮,所以特別送咗米奇同美妮嘅公仔、美妮嘅頭箍同復活節朱古力畀佢,佢之後仲同美妮見面, 影相之後唔捨得放手,擁抱咗幾秒O添啊!

  由於John Legend曾演唱迪士尼真人版電影《美女與野獸》主題曲,樂園就安排佢哋一家三口同貝兒公主見面,Luna有機會第一次親親貝兒公主,佢見完公主後立即愛上她,仲即刻換上貝兒公主裙,好可愛啊!佢哋仲去咗小小世界、迪士尼魔法書房等地方遊玩,又試食中餐,玩足三小時,非常開心!

Kelly Chu


hd