Executive日記——蓋個心心Sweet爆 娥姐粉絲選票示愛

        立法會補選塵埃落定,一言一行都好受網民關注嘅參選人陳玉娥(娥姐),得票率不足百分之一,連選舉按金都拎唔番,不過佢都有意外收穫,有人送咗張無敵Sweet嘅選票畀佢,選票上以印章蓋咗個心心!選唔到都開心到飛起啦。

        全城關注立法會補選,Kelly昨日唔瞓都睇電視直播,想盡快知道選舉結果,點知睇睇吓,畀小妹見到啲得意花絮,新界東有一個票站展示一張問題選票,選票上屬於三號候選人陳玉娥嘅方格,畀人用印章蓋咗一個心形符號!呢張選票當然唔符合投票要求被視作廢票,但可見呢位選民對娥姐嘅愛意滿瀉,直頭要用選票公開表白咁喎!娥姐落敗,但見到呢張選票,一定會好冧啦!

  但小妹諗娥姐昨日一定好攰,事關喺昨天早上建制派上台慶祝時,竟然一齊上台,唔單止企喺李慧琼、鄭泳舜、鄧家彪、麥美娟、黃國健等人隔離,同佢哋一齊舉手致意,當佢哋自拍留念時,娥姐仲「亂入」一齊合照,不過佢個樣睇落有啲呆滯同疲倦,好似有啲失魂落魄咁,希望佢好好休息後會精神番啦!

Kelly Chu

hd