Executive日記——加種櫻花 明年唔使飛日本 昂坪花海 爭妍鬥麗好奪目!

        春天滿山花蹤,Kelly同老友最鍾意呢個時候去昂坪賞花,由政府栽種嘅一批櫻花花期已過,但喺昂坪市集見到多種花朵,包括黃花風鈴木、杜鵑、巴西野牡丹等,佢哋色彩繽紛,爭妍鬥麗,令人心花怒放!

        小妹同朋友乘坐纜車去昂坪市集,途中見到一片煙雲霧海,景象壯觀!落車後,見到市集周圍種滿鮮花,小妹最鍾意嘅係「巴西國花」黃花風鈴木,睇落就好似一個個金黃色嘅風鈴,十分奪目。黃花風鈴木又名黃鐘木或風鈴木,屬於落葉喬木,通常三月開花,不過花期短暫。

  昂坪市集中有另一種來自巴西嘅品種—「巴西野牡丹」,佢屬於野牡丹科,啲葉對生,長橢圓狀至披針形,葉面有細茸毛;而花冠係深紫藍色,中心嘅雄蕊係白色,有五塊花瓣。佢原產自巴西南部,喺熱帶、亞熱帶溫暖地區廣泛栽培,花期橫跨夏天同秋天。

  小妹仲知道,可持續大嶼辦事處今年初已經喺昂坪市集、寶連寺一帶種植幾百棵櫻花樹,預計下年春天會盛開,屆時會成為本港賞花熱點,以後唔使專登坐飛機去日本,都有櫻花睇啦!

Kelly Chu

hd