Executive日記——食鯛魚帆立貝

可增財運健康運?!

  好多香港人鍾意食壽司,最近有個調查就發現,原來港人食壽司時,叫嚟叫去都係三文魚、吞拿魚、蝦等熱門水產,十分之單調,調查機構話,其實大家可以試吓食油甘魚、鯛魚及帆立貝等水產,仲話呢三種水產可以有助增強狗年財運及健康運O添,呢個說法真係好有趣!

  日本貿易振興機構 (JETRO)嘅新成員The Japan Food Product Overseas Promotion Center(JFOODO) 話,有三種水產被日本人視作吉祥之物,有助催谷運程咁話,例如油甘魚別名係「出世魚」,名字隨成長而改變,就好似喺社會上步步晉升一樣,寓意成功和好運。

  相傳日本豐收之神惠比壽曾手執鯛魚現身,鯛魚就成為日本幸運之魚。而帆立貝嘅形狀同帆船嘅帆好似,帆立貝游泳嘅姿態,就好似帆船乘風啟航一樣,「帆立」一詞喺日本亦有一帆風順之意,被視為幸運水產啦!大家下次食壽司時都可以試吓呢幾款,可以提升運勢都未定!

Kelly Chu

hd