Executive日記——患癌仍要活得精采! 維園花卉展 堅強仙子行貓步

  維園花卉展覽聽日就結束喇,Kelly同埋班好姊妹昨日去賞花,點知唔只見到花,仲見到森林仙子!原來花展昨日有場Catwalk show,六位癌症病人同康復者穿上由國際級花藝師設計嘅鮮花服飾,扮演成森林仙子、羽衣天使、鄉村少女等行貓步,藉此宣揚「不完美,才是美」嘅訊息!

  活動由癌症資訊網慈善基金與花藝工作室Petite Petals合辦,六位癌症病人同康復者以鮮花和蝴蝶作衣飾,演出命名為「蝶舞飛揚」嘅貓步,其中癌症康復者Connie所穿嘅紗裙配以一串串花朵及蝴蝶,蝴蝶有重生嘅意思,就好似Connie嘅人生一樣,經歷癌病後仍然活得精采。而癌症康復者芝芝就身穿以粉紅色為主調嘅服飾,展現自信女性化嘅一面。

  佢哋話,穿上由花藝師度身訂造嘅服飾勇敢走到台前,係希望向大家分享,患上癌症並唔係末日嘅訊息,即使遇上癌症仍要活得精采。而兩位花藝師就話,希望借鮮花和蝴蝶嘅造型和美態,代表癌症病人或康復者經歷病發和治療嘅痛楚,憑住堅忍和信念,反而得到更多人生意想不到嘅經驗。

周一派發大麗花

  花展聽日就結束喇,康文署之後會將約五千盆狀態仍然良好及可再種植嘅大麗花公開派發畀市民,有興趣嘅市民可以喺下星期一中午十二時到維園南亭廣場領取,每人限取一盆 ,先到先得㗎!

Kelly Chu


hd