Executive日記——OFO時薪120元 招聘單車巡邏員

        共享單車數目氾濫,使用者又到處亂泊,Kelly見到都心諗,點解一項原意甚好嘅服務走咗樣。有共享單車公司為撥亂反正,以最高時薪一百二十蚊招聘「單車巡邏員」,工作包括執好泊喺街頭嘅單車,又防止阻街,咁嘅態度,真係畀個Like先得!

        自共享單車概念引入香港之後,小妹經常都喺街見到好多架單車隨處停泊,非常阻街之餘亦可能絆倒途人。內地共享單車公司OFO曾經同運輸署、區議會等商討,宣佈將招聘一批清理單車嘅「巡邏員」,薪酬視乎日子而定,時薪由五十蚊至最高一百二十蚊不等。

  小妹聽講,「巡邏員」工作時,透過公司大數據,搵出各區單車停泊嘅情況,去現場「執車」,如果見到單車有破損就帶去維修。

  此外,OFO仲建議政府參考新加坡嘅做法,喺車站等地劃出單車泊位,而建設費用由同行共同承擔,以解決單車亂泊阻街嘅情況,當局真係要諗諗佢。

Kelly Chu

hd