Executive日記——二戰時法國發明 消波塊有段古原設計擋坦克

港珠澳大橋東西人工島防波堤係咪被沖散一事,政府多次解畫冇事,事件中扭工字塊成為焦點,唔講唔知,呢種用嚟築成防波堤嘅消波塊,原來係軍事物資,由法國發明,喺二次大戰用嚟阻擋德國坦克進攻㗎!

Kelly喺網上搵到一個說法,話消波塊(Tetrapods)早在二次大戰時出現,當時法軍用類似嘅四腳錐體大石塊,阻擋德軍坦克前進,而戰後石塊被棄置到摩洛哥嘅卡薩布蘭卡防波堤周圍,諗住廢物利用,估唔到消波效果十分良好,結果法國由一九五○年開始大量生產,之後唔同形式嘅消波塊都相繼出現,包括弱波石(Dolos)。消波塊有唔同形狀,例如三腳或四腳錐體、圓型、球狀等,仲有西貢萬宜水庫同港珠澳大橋人工島用嘅扭工字形。佢哋嘅尺寸同重量都不一,視乎工程設計,由半噸至八十噸都有,以一個緊扣一個方式,用作消散海浪衝擊力,減低堤岸嘅侵蝕!

  土力工程處前處長陳健碩同小妹講,本港昔日未採用消波石之前,係用大石去防波,但大石難以控制形狀,而且運輸麻煩,相反消波石係用碎石、英泥、沙、鋼筋等所製,製造過程方便,又易運輸,比大石好用得多。

Kelly Chu

hd