Executive日記——綠色殯葬新方向 骨灰晶石回憶摯親

  龕位短缺,食衞局建議新嘅公營龕位要增設使用期限,受到唔少人批評,有人認為政府應着力推廣綠色殯葬,提出一個新建議,就係「骨灰晶石」。Kelly問過一間提供骨灰晶石服務嘅店舖,佢哋話o依家愈來愈多人選擇以此保留先人骨灰,仲可製作成好多唔同形式嘅晶石,靚靚保留住親人嘅回憶!

  仁智永恆晶石負責人馬小姐話,客人可以選擇將先人嘅全部骨灰製成晶石水晶瓶,收費由五萬九千元起,亦可將部份骨灰製成晶石,形式包括製成吊墜、手鐲、耳環等飾物,或製成一個可刻字的水晶座,或一本可附有先人相片及悼念說話的水晶書,共有十多種款式可選擇。晶石的形狀包括方形、圓形、心形等,晶石大小同價錢視乎想要嘅款式。小妹見到一款「一卡寶石18K白金吊墜」收費九千六百八十元。晶石一般都會呈現白、灰或綠色,如果想要藍色,亦可向店舖提出。

  馬小姐話,骨灰晶石喺坊間出現約有十年,佢哋店舖就營業六年,以前好多人未接受將骨灰製成晶石,佢哋常被人指罵,但近一、兩年多咗人接受到,多咗人揀將骨灰做晶石。佢稱唔少人喺親人離世時都難以立刻接受,晶石可以畀佢哋喺過渡期作悼念,幫助佢哋釋懷。

  各界關注骨灰龕法案大聯盟發言人任國棟就話,將骨灰撒喺紀念花園或海中,令人感覺好似乜都留唔番低,失去憑藉,佢覺得骨灰晶石可以避免以上問題,認為政府應參考私人市場,提供公營骨灰晶石服務,以成本價幫助市民處理先人骨灰。

Kelly Chu


hd