Executive日記——加入環保概念 循環再造減廢 ArtisTree舊書變大型裝置藝術

        舊書睇完,掉棄好浪費,可以諗計俾佢有第二次生命!太古坊ArtisTree由昨天一連四日舉行二手書義賣,同場仲舉行有意義嘅舊書變藝術品活動,有藝術家將舊書碎成紙條,即場編織成大型裝置藝術,化腐朽為美感,抵讚。

        太古地產昨日起舉行「書出愛心 十元義賣」活動,按書類分成五個展區,另外再喺「互動藝術區」,俾大人同細路齊齊參加。Kelly見到佢哋睇書睇得相當入神啊!十五萬本捐書會以每本十蚊賣出,收益全數撥捐「香港小童群益會」及「義務工作發展局」作慈善用途,付出小小就可以做善事,何樂而不為?

  今次嘅義賣活動加入唔少環保嘅概念,如教參加者將牆紙製成卡片套嘅工作坊,宣揚循環再造,減少浪費。主辦單位今次請嚟藝術家陳麗雲,用舊書碎成紙條,帶領參加者編織裝置藝術品,賦予書第二生命,用另一種形態保存起嚟。太古地產傳媒關係經理余似心話,希望大會「升級再造」嘅風氣可以影響其他舉辦活動嘅機構,為社會發放好嘅環保信息。

Kelly Chu


hd