Executive日記——野生長大食得安心 日大閘蟹夏季襲港 蟹癡有福

        秋天係食大閘蟹嘅季節,去年店舖首次引入日本北海道石狩川野生大閘蟹,成為一時話題,點知過咗大半年,日本大閘蟹又嚟啦,原來北海道春夏之交都有野生大閘蟹撈捕,短期內又會登陸香港,以後連四、五月都有大閘蟹食啦!

        生長於北海道石狩川之天然野生大閘蟹(Mokuzu),去年秋天首次輸入香港,由於生長喺水質純潔嘅野外,蟹肉鮮甜!由於係野生而唔係人工養大,所以食得安心啲。原來呢款北海道大閘蟹秋天肥美之外,蟹乸喺每年四、五月係繁殖期,佢哋會吸取河流中更多營養,令到蟹膏更多及更結實,呈現橙色,同蟹膏係黃色嘅蟹公好唔同,所以日本人會喺呢個時候捕撈食用。

  日本活蟹料理專門店「蟹膳」負責人劉承輝話,呢款大閘蟹嘅捕獲期由四月中至五月中及九月底至十月底進行,喺四、五月時期,蟹乸會較好食,佢哋每星期入一次貨,預計整個四至五月進口五千至六千隻大閘蟹,如果受歡迎,以後大家喺初夏時份都可以都食到大閘蟹啦。

Kelly Chu


hd