Executive日記——太古Lydia全球跑勻12個馬拉松 靚女平壤跑全馬 好有奧運選手feel

  提起北韓,好多人都會覺得好神秘,但Kelly嘅太古集團老友Lydia,唔單止以跑會友,最近仲跑到入北韓,參加咗平壤馬拉松全馬!佢同小妹分享時,讚歎「有咩型得過有五萬人歡送你起步同回歸」,形容好有奧運選手feel咁話!跑齡差唔多五年嘅Lydia,喺全球跑過十二個馬拉松,但北韓令佢印象最深刻。

  太古集團公共事務經理Lydia Tsui今個月八號去咗平壤參加馬拉松全馬比賽,佢同小妺講,話本身對北韓其實無咩興趣,但一次喺社交網站見到一張朋友喺巴黎羅浮宮前拉筋嘅相,激起佢嘅願望,好想跑番個咁「型」嘅馬拉松!而當日佢同朋友喺金日成競技場開跑,全場滿座,獲五萬人歡送跑手起步同回歸,形容好有奧運選手feel,夠晒型呀!

  沿路觀眾嘅打氣方式都令Lydia印象深刻,佢話平時喺香港玩馬拉松,路人都會又歡呼又吹口哨,但相對上北韓人就比較怕醜,最多只會細細聲講幾句「hi」、「bye」就算,有人發現佢係中國人之後,更加用普通話同佢講咗聲「你好」,相當得意。

  跑齡差唔多有五年嘅佢,不時會約埋朋友去外國跑馬拉松,寓跑步於旅遊,但今次經驗最深刻,除咗五日四夜嘅旅程都上唔到網、跑步期間想影相會被人喝止之外,發現原來當地食物亦唔差,冷麵、啤酒、烤肉咩都有!聽到Kelly都心癢癢,好想去見識吓!

Kelly Chu

hd