Executive日記——智營設計原創產品 優杖隱形鼻罩攞大獎

        近年有唔少設計都融入創科元素,由香港出口商會主辦嘅第七屆「香港智營設計大賞2018 」昨日舉行,Kelly去開開眼界,場內共有九十項本地原創產品獲獎,其中嘅「優杖」同「隱形鼻罩」仲榮獲三個大獎O添!

        第七屆「香港智營設計大賞2018」共有九十項產品獲獎,盡顯本港設計嘅實力!其中一項產品「優杖」仲分別獲得「智齡大獎」、「優閒動樂組別金獎」、「評審團大獎」,三喜臨門,小妹都戥佢哋開心啊!

  點解「優仗」獲佳績?等小妹同大家介紹下其過人之處!「優杖」係全智能枴杖,內置嘅感應器可偵測到環境變化,自動為用家提供相應嘅功能,如照明、手柄發暖及緊急求救等,最勁係仲感應到用家跌倒,立刻自動向指定聯絡人發出求救訊號,可大大減低延誤救援嘅機會!

  另一項獲得兩個評審團大獎同「保健及個人護理組別金獎」嘅「隱形鼻罩」亦好犀利。項目經理林勵章話,覺得空氣污染問題好嚴重,又有好多人嫌焗唔鍾意戴傳統口罩,所以就想發明一個隱形鼻罩。產品符合人體工學設計,仲可以滴「花水」落去,別具有香薰治療效果㗎!

  香港出口商會會長兼香港智營設計大賞召集人鮑潔鈞話,智營設計大賞今年增設「卓越包裝大獎」鼓勵業界於包裝設計上擴展創意咁話。

Kelly Chu


hd