Executive日記——近年使用數字升 漸見成效 綠色殯葬簡約夠環保

        環保風氣愈吹愈旺,綠色殯葬開始被市民受落,Kelly覺得好好,環保、節能、簡約、可持續,且讓逝者回歸自然。政府近年推廣綠色殯葬,小妹想知近五年推廣嘅成效如何,問過食衞局,佢哋提供嘅數字顯示,使用綠色殯葬嘅人愈來愈多,無論係紀念花園撒灰定海上撒灰嘅數字都有上升,如果加埋私營墳場處理嘅綠色殯葬宗數,去年死亡總人數之中,有一成五都使用綠色殯葬呢!

        食環署提供嘅數字顯示,去年申請喺紀念花園撒灰有四千九百六十六宗,較一三年嘅二千三百五十四宗為多;而去年申請喺海上撒灰就有九百六十六宗,亦較一三年嘅七百九十七宗上升。撒放骨灰總數由一三年嘅三千一百五十一宗,增加二千七百多宗,至五千九百三十二宗,撒放骨灰總數佔死亡總人數嘅百分比,亦由一三年嘅百分之七點三,上升至去年嘅百分之十二點九。

  食衞局話,如果加埋私營墳場嘅綠色殯葬宗數,去年嘅使用總數佔死亡總人數嘅一成四多啲,綠色殯葬開始流行,已成事實!另外,由食環署管理嘅「無盡思念」網站共有五千八百七十九位先人嘅紀念網頁,去年新增嘅先人網頁有一千四百九十三個,而去年網站嘅訪客人次達六十七萬五千九百四十七人,亦證明使用綠色殯葬嘅人愈來愈多。小妹諗,政府話骨灰位唔夠,考慮限時收回,其實鼓勵多啲人用綠色葬禮,長遠更有效解決問題喎。

Kelly Chu

hd