Executive日記——周五起粉嶺舉行公開賽 港高球美少女 朝奧運夢進發

        一年一度「香港女子高爾夫球公開賽」將於今個星期五舉行,被視為本港高球第二梯隊嘅三位高球美少女陳婥兒(Chloe) 、張穎怡(Michelle)同梁稀嵐(Isabella)整裝待發,期望喺比賽中奪得好成績躋身國際舞台,朝住奧運夢進發,Kelly覺得佢哋真係好犀利啊!

        比賽於今個星期五一連三日喺粉嶺香港哥爾夫球會舊場舉行,齊集世界各地逾百位女高球手一較高下,Chloe、Michelle同Isabella三個有主場之利嘅香港代表自然抓緊時間練習啦!佢哋同Kelly講,粉嶺球場嘅地形偏窄長且遍種樹木,非常有挑戰性,但好彩場地有部份係屬於港隊,三人一有時間就去操練,練得多,自然就深諳當中竅妙,所以對嚟緊嘅比賽都好有信心!

  佢哋仲話,一直視師姐陳芷澄為學習對象,希望可以學佢咁跨進奧運大門,其中Chloe同Isabella更立志要向着二○二○東京奧運進發,好有志氣!而對於最近有意見提出要將球場收返嚟起樓,佢哋三個都話唔同意,因為呢個球場嘅設施係訓練高球手嘅好地方,Isabella仲話,香港嘅高球場其實唔多,連新加坡咁細都多過香港,所以想普及高球運動,就唔應該再減少球場數目喇!

Kelly Chu

hd