Executive日記——象徵香港聯繫中國同歐盟 旅發局慶歐洲日 彩燈橋好意頭

  今年係「中國歐盟旅遊年」,旅發局同歐盟駐香港及澳門辦事處為咗慶祝昨日係「歐洲日」,舉行咗「香港歐盟彩燈橋」活動,昨晚七至十一點喺尖沙咀鐘樓度亮起代表歐盟旗幟嘅藍色燈光,Kelly覺得好靚呀!

  「中國歐盟旅遊年」係旨在加深中國同歐盟人民之間嘅了解,推廣兩地文化交流,而呢個「香港歐盟彩燈橋」就係慶祝活動之一喇!Kelly昨晚睇住尖沙咀鐘樓亮晒藍色燈光,都咪話唔震撼啊!旅發局老友話畀小妹知,原來藍光係代表歐盟旗幟嘅顏色,象徵住香港同歐盟之間嘅友好關係,更係聯繫中國同歐盟兩地嘅橋樑,好有意思㗎!

  旅發局主席林建岳仲話,香港一直深受歐洲旅客歡迎,單係上年訪港歐洲旅客數字就有接近二百萬人次,相信隨著港珠澳大橋同廣深港高速鐵路香港段開通啟用,會有更多歐洲旅客親身體驗,發掘兩地的旅遊樂趣。

  唔止咁,除咗香港之外,中國三十幾個地標建築,好似北京頤和園同萬里長城等,昨晚都亮起燈光響應呢次活動,認真犀利。Kelly仲知道,今年三月農曆元宵節期間,橫跨歐洲十八個國家,超過五十個地標建築,包括比利時布魯塞爾大廣場、丹麥小美人魚等,都亮起咗代表中國嘅紅色的燈光,好威水!

Kelly Chu


hd