Executive日記——套票包睇演唱會、玩樂園同住酒店好抵 五月天粉絲玩轉迪士尼

        台灣天團五月天來港首次喺香港迪士尼開騷,吸引咗世界各地唔少「五迷」嚟捧場,連帶迪士尼套票都超受歡迎呀!Kelly最近就識咗幾個台灣「五迷」,唔止齊齊買晒套票嚟香港追星,上星期日仲一齊入樂園玩、睇埋演唱會,再直落住埋酒店歎番晚,好爽呀!

        呢四個台灣「五迷」,分別係陳宇任(Ryan)、武若涵(Christine),同親姊妹林瑞琪同林瑞琳,除咗Christine之外,其餘三人都係第一次嚟香港玩!佢哋話畀Kelly知,因為覺得五月天第一次嚟香港迪士尼舉行露天演唱會,機會難得,加上一直都鍾意天團同迪士尼,所以一見到迪士尼推出套票,包晒演唱會飛、樂園門票同酒店咁抵,就二話不說飛過嚟喇!其中最愛米奇嘅林氏姊妹,當晚見到米奇米妮上台做嘉賓,簡直開心到爆燈呀!

  Ryan同Christine兩個老友仲話,住喺迪士尼酒店夠晒方便,因為一睇完演唱會當晚十點幾,就即刻有穿梭巴士送佢哋返酒店,之後又有餐飲服務提供,第二日又可以即刻入樂園玩同血拼,好正咁話!

  其實迪士尼今次推出嘅「迪士尼樂園兩日一夜優惠套票」,一個價錢包晒兩張五月天演唱會門票、標準樂園門票、酒店客房住宿、免費迪士尼樂園遊樂設施優先入場證同各種優惠,絕對超值,難怪一推出就成功吸引本地、內地、台灣,甚至新加坡同日本等地遊客到訪,勁呀!

Kelly Chu


hd