Executive日記——人龍排出馬路 警維持秩序 崇光周年慶搶平貨 大陣仗封路

         崇光百貨(SOGO)半年一度嘅「感謝周年慶」都會吸引好多人去搶平貨,皆因好多優惠真係好吸引!今次「周年慶」昨日又開始喇,SOGO門外一早已經大排長龍,人龍仲排到對出馬路,要警察派人嚟維持秩序,慢線亦一度需要封路,好瘋狂啊!

        有網民昨日喺社交群組「香港突發事故報料區」度報料,話見到銅鑼灣SOGO門口出現大批人潮,更加多人到迫到出馬路,要警方派員出動維持秩序,連警車同救護車都要慢駛先行到,場面震撼!Kelly落到現場,仲見到唔少人拉着行李篋,打算嚟瘋狂掃貨,聽聞有人更豪花咗幾萬蚊嚟血拼O添,認真嚇親小妹!

拖篋者眾

  咁大陣仗,皆因SOGO每半年一度嘅「感謝周年慶」都會以劈價優惠活動作招徠,其中包括有低至六九折嘅無線吸塵機、六折嘅座墊式揹帶、低至四折嘅鑄鐵鍋等,夠晒抵!難怪除咗銅鑼灣之外,尖沙嘴門市亦出現大批人龍,門外門內層層樓都堆滿晒人,只為買到自己嘅心頭好,認真有恒心!但買還買,Kelly奉勸大家都要注意安全呀!

Kelly Chu


hd