Executive日記——花店定單多到做唔切 母親節食餐好 book枱一早爆

        聽日就係一年一度嘅母親節,不少孝順仔、孝順女當然要趁機慰勞吓偉大嘅媽媽啦!Kelly打聽過,今年除咗康乃馨、玫瑰花等禮物繼續狂收order之外,阿一海景飯店、留家廚房、福臨門等著名餐廳未來兩日booking都已經一早full晒,菜式仲好豐富添,海斑、鮑魚、桃膠樣樣有呀!

        話明母親節,當然唔少得同媽媽食返餐好!留家廚房負責人劉晉同Kelly透露,未來兩日嘅booking一早爆晒,除咗夜晚兩個時段之外,連午餐都滿額,認真犀利!佢話今年菜單繼續以傳統中菜為主,包括會有時令冬瓜盅、蒸海斑同花雕雞等等。

  另一名店阿一海景飯店同樣受歡迎,董事陳志豪話,今年主要set咗兩個母親節套餐,每位價錢由三百零八至九百八十八不等,除咗食到有齊鮑魚、刺參、花膠嘅名貴佛跳牆之外,仲有「萬壽果杏汁燉桃膠」做甜品,養顏又夠滋補,啱晒媽媽食!而「名人飯堂」福臨門母親節當日午餐同晚飯亦都已經滿座。

  食豪啲之外,送花當然都唔少得,牛記花店同繽紛園藝都話,今年定單繼續多到瀉,仲平均比往年多兩至三成添!另外,朱古力店Sayvour今年亦同人氣花店 M Florist合作,推出母親節限定嘅花束連朱古力禮盒套裝,有花之餘,仲有I LOVE MUM或者THANK YOU MUM字母朱古力收,有心思又有新意!

Kelly Chu

hd